لما نعرف قيمة بعض !!!

فيه برنامج تلفزيوني علي قناة دريم الفضائية إسمه الطبعة الأولي أذاع خبر إمبارح ..أقل مايوصف به أنه يوضع تحت باب صدق أو لا تصدق.. يتحدث عن إبن من أبناء مصر إسمه عصام حجي .. هذا الإبن خريج كلية العلوم جامعة القاهرة..و أنا غير متأكدة هل حصل علي الدكتوراة من مصر أو من أمريكا .. إنما كما يقولون أصل الفتي ما قد حصل .. الفتي سافر أمريكا و أصبح أحد إثنين أو ثلاثة مصريين في وكالة ناسا للفضاء ..ويعمل الأن ضمن فريق سيذهب للبحث عن المياة علي سطح المريخ .. الفتي مصري .. غير كدة تحت إيده ستة علماء من جنسيات مختلفة بيعملو في مشروع تكلفته نصف مليار دولار .. لتغيير مسار كويكب سيصطدم بالأرض بعد عشرين سنةإن أحيانا الله .. و مهمتهم إرسال صاروخ ذو رأس نووية للتصادم معه و جعله ينحرف وربما يتفتت بعيدا عن الأرض..و ماخفي عن هذا الشاب المصري الذي لم يكمل عامه الأربعين كثير.. طيب إيه المشكلة ..إنه طفش..عادي..طيب إيه .. حنعيد و نزيد في نزيف العقول وهرب العلماء ..والاسطوانة البايخة دي ..لالالالالالالالا.. دي حاجة بقي مفروغ منها..أمال إيه .. فوجيئ العالم المصري النابغ الشاب ..بإنذار مرسل إليه من جامعة القاهرة طبعا من موظف جهبذ من موظفينا الأجلاء ..ممهورا بالعديد من التوقيعات إللي أصحابها ..أتحدي يكون واحد فيهم عارف بيوقع علي إيه ..لأن لو عارف ووقع دي مصيبة تقيلة .. ولومش عارف ووقع فالمصيبة مصيبتين..الإنذار فحواه باختصار طبعا بعد الاطلاع علي معرفش ايه وايه وقاون ايه وكمنجة ايه .. إنه مطلوب للتحقيق ..ولابد يحضر فورا..ياساتر يارب..الراجل سرق..ابد ..نهب أبدا..عمل ايه بس يخلي الدنيا تتقلب و لا تنعدلش..كل اللي عمله و خلاهم يتهزوا و يسارعوا لاستدعائه و يخلوا مسئوليتهم .. إنه لم يحضر مراقبة إمتحانات معرفش دور كام .. سنة كام...ده معقول .. ولحد أمتي جهابذة العمل الحكومي حايفضلوا يحرقوا في دم الناس.. المصيبة الكبيرة قوي إنهم فاكرين نفسهم كفاءات نادرة ولا جابتهومش ولادة ... لكي ربنا يابلدنا .. ولسة ياما حانعمل فيكي....