هي الحقيقة فين؟؟؟؟...هو فيه إيه.....؟؟؟؟؟

مصنع البتروكيماويات في راس البر...

الدنيا قايمة و ما قعدتش..الموضوع اصبح يتحدث فيه اللي له و اللي مالوش..

الواحد إحتار ..ليه لما يكون فيه بلبلة بالشكل ده ..ماتظهرش الشفافية...هو ده مكانها..حقيقي أنا قرأت موضوعين في منتهي الجمال في روز اليوسف الأسبوع ده و المصري اليوم عدد اليوم ..لخصوا الموضوع ..وذكروا معظم الآراء..و تابعت ماقدم أمس في برنامج العاشرة حيث حضر نواب دمياط و مسئولي الشركة..لكن فيه حلقة ناقصة في الموضوع..حسيت إن ممثلي المدينة بيلفوا و يدوروا حول شيئ مش عايزين يقولوه..و الظاهر غير الباطن ..و مابين السطور شيئ مختلف عن المعلن..

ملخص الموضوع..كما ذكر في المجلة و الصحيفة :

أهل المدينة بيقولوا الموقع سياحي..

الدولة بتقول الموقع ضمن أراضي الدولة المخصصة للمشروعات..

أهل المدينة بيقولواالتلوث سيصيب الأهالي بالأضرارالصحية..

وزير البيئة بيقول الموقع أقل المواقع من حيث المخاطر البيئية..

المصنع جاري البناء فيه علي قدم و ساق برغم الدوشة و الزيطة..طبعا فيه ارتباطات و تمويل..

رأي الجهات العليا..ضرورة تبصير الأهالي و طمأنتهم...

عضو بمجلس الشعب يقول الأهالي دخلوا في صراع حكومي - حكومي..و الله ماانا فاهمة حاجة..

غالبية الجهات صامتة..كأبو الهول..طيب ليه..

مسئولوا الشركة خرجوا عن صمتهم و اتهموا المصالح الخاصة بأنها وراء الموضوع...وجهة نظر..

البنوك التي تقوم بتمويل المشروع قبل الموافقة علي التمويل و صرف أموالها اشترطت توافق المشروع مع الشروط البيئية المصرية..

يشار بأصبع الاتهام للإشاعات المغرضة أنها وراء الأزمة و إنفجارها ...؟

المصنع يبعد 5 كيلومتر عن كل ما حوله..و الأهالي يقولون أقل من ذلك بكثير جدا..ولكل مقاييسه التي يقيس بها..

يوجد مصنع مشابه علي بعد 500 متر من هذا المشروع وبنفس المنتج و لم يعترض أحد من قبل..

المشروع حصل علي كل الموافقات السيادية..طيب إذا كان فيه مشكلة ..ليه تمت الموافقة..

أكبر الشركات العالمية أكدت أن دراسات الحمل البيئي وفقا للإشتراطات..

إختيار المكان ..تم لأنه بجوار ميناء..وهو يعتبر أنسب مكان..

الدمايطة قلقين لإنخفاض أسعار الشاليهات و الفنادقو الأراضي.بس إحنا اللي رايحين نتفسح فرحانين ..ومصائب قوم عند قوم فوائد..

ممكن أن يكون لهذا السبب هما مكسرين الدنيا ..وممكن يكونوا هما اللي أطلقوا الإشاعة علشان الأسعار تنزل بشكل مؤقت و لما يزال المصنع ..ترفع الأسعار أضعاف الأضعاف..وتتخم الجيوب أكثر و أكثر..وهما حريفة تسقيع الأراضي و الشاليهات و خلافة..

مليونيرات دمياط لا يسمع عنهم أحد..بيشتغلوا في الدرا..سمعنا عن كل الناس الا هما..وجه الوقت علشان ربما المستخبي يبان..

بيقال إن فيه واحد دمياطي إسمه محمد كسبة..أرسل رسئل علي المحمول SMS لكل الناس في دمياط يقول لهم الحكومة عجزت عن تحديد النسل فجاية دلوقت تخفف أعدادكم بالمصنع ده...ياتري إيه مصلحته..

وصل الأمر إنهم دلوقت بيتهموا بعض أنهم أخذوا رشاوي من الشركة وصلت 25 مليون..يعني إيه ..عايزين زيهم واللا بيبلغوا عنهم..

إتهموا المحافظ إنه ورا الإشاعات علشان واحد قريبة حايعمل استثمار سياحي في راس البر..

عايزين يعملوا راس البر محمية طبيعية..علشان بيمر عليها 73 نوع من الطيور المهاجرة..و المصنع سيضر بالتوازن البيولوجي ...ده هما اللي بيقولوا..طيب رأي الجهات المختصة إيه..علي قد معلوماتي الضعيفة إن بيمر عليهم السمان و بيصطادوه و يدبحوه و يقدم في الفنادق..هي دي الحماية..وهو كل واحد يقول نعمل محمية تبقي محمية..؟؟؟

د محمود سالم .رئيسقسم العلوم البيئية..أيد هذا الكلام من ناحية زيادة الحمل البيئي..والذي سيؤثر علي تفريخ بيض الأحياء المائية حيث أن هذا المكان منطقة مركزية لهذا النشاط واستهلاك المياه الفائق سيؤثر علي الثروة السمكية..

د. عزة الأسمر..قالت إن الغازات المنبعثة نتيجة إنتاج الأمونيا..ستصيب الأهالي بأضرار بالغة..ثم سكتت عن الكلام المباح..

يتهم مستثمر آخر بأنه وراء الإشاعات..

حتي قبرص و اليونان قالوا إنهم حيقاضوا مصر( حسب ماجاء بالمقال ) لأنه سيؤثر علي التزاوج بين الشواطيئ المصرية و القبرصية و اليونانية......؟؟؟؟؟؟

المستثمرون رفعوا 150 دعوة قضائية....؟؟!!

المصنع سينتج الأسمدة التي ارتفعت اسعارها و البلاد في حاجة إليها..وكانت هناك أزمة للأسمدة الشهر الماضي..

سيوفر الآلاف من فرص العمل..سواء بداخله أو بالميناء..

هو مشروع قومي بالدرجة الأولي..

آخر حاجة بقي..تلاميذ مدرسة المحبة الإلهية للراهبات...هم كمان مرعوبون و خائفون...

اللي يفهم حاجة يفهمني.......!!!!!!!!! مين؟ عايز إيه ؟؟